Geniş yaradıcılıq diapazonuna malik olan dahi bəstəkarımız Qara Qarayev üçün janr çərçivələri məhdudluğu yox idi. Qarayev elə bəstəkar idi ki, hansı musiqi janrına müraciət edirdisə, onun qələmindən yüksək sənətkarlıqla cilalanmış əsərlər çıxırdı. Nədənsə, musiqişünaslıqda Qarayevi daha çox instrumental musiqi üslubunun ustadı kimi təqdim edib, onun simfonik, instrumental, balet musiqisi haqda yazır, danışır, diskussiyalar aparır, vokal yaradıcılığını bir qədər arxa planda qoyurlar. Halbuki, bəstəkarın "Mən sizi sevirdim", "Gürcüstan təpələrində" kimi romansları, Cövdət Hacıyevlə birgə yazdığı "Vətən" operası, Ömər Xəyyamın sözlərinə yazılmış "Altı rübai", "Zəriflik" monooperası, "Çılğın Qaskoniyalı" romantik musiqili komediyası, gözəl vokal-simfonik xor əsərləri musiqi tariximizin parlaq səhifələrini təşkil edirlər. Onu da qeyd etmək lazımdır ki, Qara Qarayev instrumental janrlarla yanaşı vokal musiqi ilə bağlı janrların da, demək olar ki, hamısının ilk yaradıcılarından olmuşdur.

Həqiqi vətəndaş, müasirlik carçısı olan Q. Qarayev çox geniş maraq dairəsi, ensiklopedik təfəkkürə malik bir sənətkar idi. O, Azərbaycanla yanaşı müxtəlif xalqların tarixi, incəsənəti, ədəbiyyatı, musiqisi ilə tanış olub, öz yaradıcılığında onlara müraciət edirdi. Bəstəkarın təkcə elə vokal yaradıcılığına nəzər salsaq onun mövzu rən-ga-rəng-liyini, mətn müəlliflərinin zənginliyini aşkar edərik.