Azərbaycan Dövlət Konservatoriyasında M.Əhmədov əsasən alətşünaslıq fənnini aparırdı. Gözəl partitura ustası olan bəstəkar alətşünaslığın incəliklərini orkestr çalarlarının sirlərini yetişməkdə olan gənc musiqiçilərə sevə-sevə öyrətmişdir.

Onun təkcə musiqiçilər arasında deyil, ümumiyyətlə insanlar arasında az rast gəlinən bütün alətləri ayrı-ayrılıqda səsləndirmək istedadı var idi.

Avropa, rus musiqi incəsənətinin zəngin ənənələrini mükəmməl bilən M.Əhmədov eyni zamanda müasir musiqi üslublarının geniş təbliğatçısı olmuşdur. O, musiqidə mövcud olan yazı texnikasını tələbələrinə dərindən öyrədirdi. Lakin bəstəkar bununla kifayətlənmir, onları musiqi bəstələnməsi sahəsində meydana çıxan hər bir yeniliklə yaxından tanış edirdi. Proqressiv insan - M.Əhmədov böyük uzaqgörənliklə tələbələrini daima yenilik axtarışlarına sövq edir, onlardan qarşıya çıxan sualların qeyri-adi, ənənəvi olmayan üsullarla cavablandırılmasını, maraqlı həlli yollarının tapılmasını tələb edirdi.

M.Əhmədovun qazandığı bir çox dövlət mükafatları sırasında 1978-ci ildə layiq görüldüyü Azərbaycan Respublikasının Əməkdar Müəllimi fəxri adı onlardan bəlkə də ən qiymətlisidir. Çünki hər bir istedadlı yaradıcı şəxs, incəsənətin hansı sahəsində çalışmasından asılı olmayaraq, öz sənəti ilə sələfləri üçün nümunə, pərəstiş obyekti ola bilər. Yalnız çox nadir hallarda əsil sənətkar peşəkar müəllimə, ustada çevrilir. M.Əhmədov da o nadir sənətkarlardandır ki, ona bu şərəfi yaşamaq nəsib olmuşdur.

Bu gün Azərbaycan musiqisini dünyanın ən mötəbər salonlarında səsləndirən müasir bəstəkarlarımızın yaradıcılığı ilə öyünməyimizdə biz görkəmli pedaqoq, istedadlı bəstəkar, səmimi və xeyirxah insan - M.Əhmədova borcluyuq. Lakin çox yazıqlar olsun ki, belə gözəl insanın nə xatirə lövhəsi var, nə də heç olmasa, Bakıdakı musiqi məktəblərindən biri onun adını daşımaq şərəfinə layiq görülməyib. Lakin buna baxmayaraq, ustadın Əziz xatirəsi Azərbaycan musiqisevərlərinin qəlbində əbədi olaraq yaşayacaqdır.